కేబీ తండాలో పగలు–రాత్రి మట్టి దందా..?
ప్రభుత్వ భూముల్లోనే తోడేస్తున్న వైనం
మరి అధికారులు నిద్రిస్తున్నారా లేక నటిస్తున్నారా..?
మహేశ్వరం మండలంలో అక్రమ మట్టి మాఫియా రాజ్యం – కేబీ తండాలో లంచాలకు లొంగిన అధికారులు, మూగబోయిన పోలీస్ యంత్రాంగం
*రంగారెడ్డి జిల్లా మహేశ్వరం మండలంలోని కేబీ తండాలో అక్రమ మట్టి తవ్వకాలు యథేచ్ఛగా కొనసాగుతున్నాయి. అధికారుల నిర్లక్ష్యం, పోలీసుల మౌనం, ప్రభుత్వ భూముల దోపిడీపై వార్త సంధ్య ప్రత్యేక కథనం.
హైదరాబాద్/రంగారెడ్డి జిల్లా బ్యూరో, ఫిబ్రవరి 6 (వార్త సంధ్య): తెలంగాణ రాష్ట్రంలో అక్రమాలు, అవినీతి రోజురోజుకు పెరిగిపోతున్నాయన్న విమర్శలు ఇప్పటికే ప్రజల్లో బలంగా వినిపిస్తున్నాయి. ప్రభుత్వాలు మారినా అక్రమ దందాలు మాత్రం రూపం మార్చుకుని కొనసాగుతూనే ఉన్నాయి. ముఖ్యంగా మైనింగ్, ఇసుక, మట్టి తవ్వకాల విషయంలో అధికారుల వైఫల్యం ప్రజల ప్రాణాలకు ముప్పుగా మారుతోంది. అలాంటి పరిస్థితులే ఇప్పుడు రంగారెడ్డి జిల్లా మహేశ్వరం మండల పరిధిలోని కేబీ తండాలో వెలుగు చూస్తున్నాయి.మహేశ్వరం మండలంలో అక్రమ మట్టి మాఫియా రాజ్యం సాగుతోందన్న ఆరోపణలు రోజురోజుకూ తీవ్రమవుతున్నాయి. ప్రభుత్వ భూములే లక్ష్యంగా భారీ యంత్రాలతో పగలు–రాత్రి తేడా లేకుండా మట్టి తవ్వకాలు జరుగుతున్నా సంబంధిత శాఖలు చూసీ చూడనట్టు వ్యవహరిస్తుండటం అనేక అనుమానాలకు తావిస్తోంది.
కేబీ తండాలో జోరుగా అక్రమ మట్టి తవ్వకాలు
మహేశ్వరం మండలంలోని కేబీ తండా పరిసర ప్రాంతాల్లో అక్రమ మట్టి తవ్వకాలు యథేచ్ఛగా సాగుతున్నాయని స్థానికులు ఆరోపిస్తున్నారు. ప్రభుత్వ భూములు, ఖాళీ స్థలాలు, తండా సమీపంలోని పొలాల్ని లక్ష్యంగా చేసుకుని మట్టి మాఫియా భారీ జేసీబీలు, హిటాచీలతో మట్టి తవ్వేస్తోంది. ఈ తవ్వకాలు పగలు కంటే రాత్రివేళల్లో మరింత జోరుగా కొనసాగుతున్నాయని తండావాసులు చెబుతున్నారు. 15 నుంచి 20 అడుగుల లోతు వరకు బూతులు పెట్టిపోవడం వారి ధైర్యానికి అద్దం పడుతుంది.నిబంధనల ప్రకారం మట్టి తవ్వకాలకు మైనింగ్ శాఖ అనుమతులు, పర్మిట్లు తప్పనిసరి. కానీ కేబీ తండాలో జరుగుతున్న తవ్వకాలకు ఎలాంటి అనుమతులు లేవని స్థానికులు స్పష్టం చేస్తున్నారు. అయినప్పటికీ అక్రమ మట్టి లారీలు వరుసగా రోడ్లపై తిరుగుతుండటం, వాటిపై చర్యలు లేకపోవడం అధికారుల పాత్రపై సందేహాలను పెంచుతోంది.
లంచాలకు లొంగిన అధికారులు?
అక్రమ మట్టి తవ్వకాలు ఇంత బహిరంగంగా జరుగుతున్నా సంబంధిత రెవెన్యూ, మైనింగ్ శాఖ అధికారులు స్పందించకపోవడం వెనుక లంచాల వ్యవహారం ఉందన్న ఆరోపణలు బలంగా వినిపిస్తున్నాయి. మట్టి మాఫియాతో చేతులు కలిపి భారీగా మామూళ్లు తీసుకుంటూ అధికారులు మౌనం పాటిస్తున్నారని తండావాసులు ఆరోపిస్తున్నారు.ప్రభుత్వ భూముల్లో మట్టి తవ్వకాలు జరిగితే వెంటనే కేసులు నమోదు చేయాలి. యంత్రాలు, లారీలు సీజ్ చేయాలి. కానీ ఇక్కడ అలాంటి చర్యలే కనిపించడం లేదు. ఇదంతా అధికారుల కనుసైగల్లోనే సాగుతోందా? అన్న అనుమానాలు ప్రజల్లో మరింత బలపడుతున్నాయి.
మూగబోయిన పోలీస్ యంత్రాంగం
అక్రమ కార్యకలాపాలను అడ్డుకోవడంలో కీలక పాత్ర పోషించాల్సిన పోలీస్ యంత్రాంగం పూర్తిగా మూగబోయిందన్న విమర్శలు వెల్లువెత్తుతున్నాయి. రాత్రివేళల్లో మట్టి తరలిస్తున్న లారీలు ఎలాంటి భయభ్రాంతులు లేకుండా తిరుగుతున్నాయి. చెక్పోస్టులు లేవు, గస్తీ లేదు, నిఘా లేదు. ఇదే పరిస్థితి కొనసాగుతుండటంపై స్థానికులు తీవ్ర ఆగ్రహం వ్యక్తం చేస్తున్నారు.పోలీసులు కఠినంగా వ్యవహరిస్తే అక్రమ మట్టి దందా ఒక్కరోజులోనే ఆగిపోతుందన్న అభిప్రాయం ప్రజల్లో ఉంది. కానీ పోలీసుల నిర్లక్ష్యం లేదా మాఫియాతో కుమ్మక్కవడం వల్లే ఈ దందా కొనసాగుతోందన్న ఆరోపణలు వినిపిస్తున్నాయి.
విద్యుత్ స్తంభాలను ఢీకొట్టిన అక్రమ మట్టి లారీ … తప్పిన పెను ప్రమాదం
ఇటీవల కేబీ తండాలో చోటుచేసుకున్న ఓ ఘటన పరిస్థితి ఎంత ప్రమాదకరంగా ఉందో స్పష్టంగా చూపిస్తోంది. రాత్రి సమయంలో అక్రమంగా మట్టి తరలిస్తున్న ఓ లారీ అదుపు తప్పి విద్యుత్ స్తంభాన్ని ఢీకొట్టింది. ఈ ప్రమాదంలో నాలుగు విద్యుత్ స్తంభాలు వరుసగా కూలిపోయి సమీపంలోని ఇండ్లపై పడిపోయాయి.ఈ ఘటనతో తండావాసులు ప్రాణభయంతో ఇండ్ల నుంచి బయటకు పరుగులు తీశారు. అదృష్టవశాత్తూ ఎలాంటి ప్రాణనష్టం జరగలేదు. కానీ కొద్ది సేపు ఆలస్యం జరిగి ఉంటే పరిస్థితి మరింత విషమంగా మారేదని స్థానికులు చెబుతున్నారు. చిన్నపిల్లలు, వృద్ధులు ఉన్న ఇళ్లపై స్తంభాలు కూలి ఉంటే ఎవరి బాధ్యత అన్న ప్రశ్న ఇప్పుడు అందరి నోట వినిపిస్తోంది.
ప్రజల ప్రాణాలతో చెలగాటం – ఎవరి బాధ్యత?
అక్రమ మట్టి మాఫియా ఇష్టారాజ్యంగా తిరుగుతున్న లారీల వల్ల తండావాసుల ప్రాణాలకు తీవ్రమైన ముప్పు పొంచి ఉందని స్థానికులు ఆవేదన వ్యక్తం చేస్తున్నారు. ఇప్పటివరకు అక్రమ మట్టి తవ్వకాలపై కఠిన చర్యలు తీసుకోలేదని, లారీలు సీజ్ చేయలేదని, మట్టి మాఫియా నిర్వాహకులపై కేసులు నమోదు కాలేదని ప్రజలు ప్రశ్నిస్తున్నారు. ఇది కేవలం అధికారుల వైఫల్యమా? లేక అధికారుల కనుసైగల్లోనే అక్రమ దందా కొనసాగుతోందా? అన్న సందేహాలు మరింత బలపడుతున్నాయి.
ప్రభుత్వ ఖజానాకు భారీ నష్టం
అక్రమ మట్టి తవ్వకాల వల్ల ప్రభుత్వ ఖజానాకు భారీగా నష్టం వాటిల్లుతోంది. మైనింగ్ రాయల్టీలు, పర్మిట్ ఫీజులు చెల్లించకుండా మట్టి తరలించడంతో కోట్ల రూపాయల ఆదాయం ప్రభుత్వానికి దూరమవుతోంది. ఇదంతా ప్రజల సొమ్మే అక్రమంగా మాఫియా జేబుల్లోకి వెళ్లిపోతున్న పరిస్థితి.అంతేకాదు, అక్రమ తవ్వకాల వల్ల పర్యావరణానికి తీవ్ర నష్టం జరుగుతోంది. భూమి లోతులు పెరిగి నీటి ప్రవాహం మారుతోంది. వర్షాకాలంలో వరద ప్రమాదం పెరిగే అవకాశాలు ఉన్నాయి. నేల గర్భజల స్థాయిపై కూడా తీవ్ర ప్రభావం పడుతోందని పర్యావరణ నిపుణులు హెచ్చరిస్తున్నారు.
ఎందుకు స్పందించని రెవెన్యూ–మైనింగ్–పోలీస్ శాఖలు?
అక్రమ మట్టి తవ్వకాలపై చర్యలు తీసుకోవాల్సిన బాధ్యత రెవెన్యూ, మైనింగ్, పోలీస్ శాఖలపై ఉంటుంది. కానీ కేబీ తండా విషయంలో ఈ మూడు శాఖలు ఎందుకు స్పందించడం లేదన్న ప్రశ్నలు తండావాసుల నుంచి ఉత్పన్నమవుతున్నాయి.ఫిర్యాదులు చేసినా పట్టించుకోకపోవడం, తనిఖీలు జరపకపోవడం, అక్రమ యంత్రాలను సీజ్ చేయకపోవడం వెనుక ఏదో లోతైన వ్యవహారం ఉందన్న అనుమానాలు వ్యక్తమవుతున్నాయి. ఉన్నతాధికారులు స్పందించి సమగ్ర విచారణ జరపాల్సిన అవసరం ఉందని స్థానికులు డిమాండ్ చేస్తున్నారు.
ప్రమాదం జరిగితే బాధ్యత ఎవరిది?
ఇకనైనా అధికారులు స్పందించకపోతే రానున్న రోజుల్లో మరింత పెద్ద ప్రమాదాలు జరిగితే బాధ్యత ఎవరిది? అన్న ప్రశ్నకు సమాధానం చెప్పాల్సిన బాధ్యత అధికార యంత్రాంగంపైనే ఉందని స్థానికులు స్పష్టం చేస్తున్నారు. ప్రజల ప్రాణాలతో చెలగాటం ఆడుతున్న మట్టి మాఫియాపై వెంటనే చర్యలు తీసుకోకపోతే ప్రజా ఉద్యమాలకు దిగుతామని కూడా హెచ్చరిస్తున్నారు.మహేశ్వరం మండలంలోని కేబీ తండాలో కొనసాగుతున్న అక్రమ మట్టి తవ్వకాలపై ప్రభుత్వం, ఉన్నతాధికారులు తక్షణమే స్పందించి కఠిన చర్యలు తీసుకోవాలని ప్రజలు కోరుతున్నారు. లేకపోతే ఈ మౌనం మరిన్ని ప్రమాదాలకు దారి తీస్తుందన్న భయం రోజురోజుకూ పెరుగుతోంది.
About the Author
